عشقت حوريه للكاتبه اسما السيد

_ ايه …ازاي؟
لاحظت فوزيه رعشه جسم ابنها اللي واقف قدامها من كتر الضرب مش قادر يصلب طوله وكأنه سكران حقيقي..
_ ما تفوقلي كده يا خيبتها واسمع اللي بقولك عليه البنت دي لازم تتم دخلتك عليها دلوقتي علشان تخرس الالسنه دي كلها..
_ يا امه بس..انا..
كان بيقطع في الكلام لحد ما نزل رأسه بخيبه تقيله حست بيها راويه وعرفت أنه فعلا هينفذ كلام امه الخبيثه .

وسعت عين راويه العروسه وارتعش جسمها ورجعت لورا بخوف، وهي شايفه أن السحر انقلب عالساحر و سعادتها بالفوز بفريد العره وشماتتها بحوريه بعد ما عملت المستحيل علشان تأخذه منها انقلب لضدها..
رجعت لورا بخوف وهي بتبرق بعنيها وبتهز راسها ليهم:
_ مستحيل انت مش هتعمل كده يا فريد صح؟
بصلها فريد بلامبالاة على وشه ورجع لف بظهره لورا وفي نيته يسيبهم يولعوا في بعض، ساب أندمه تتعامل وتمشي الأمور على مزاجها مخدش باله أبدا من اللي انسحب الدم من وجهها و بدأت تهزي بهستيريا ..

_ لا..لا انتوا مجانين اللي هيقرب مني هقت.له انا استحاله اسيبكم تعملوا فيا كده..وفضلت تسب وتلعن فيهم وفي اليوم. اللي اتجوزته فيه..
صوتها كان مسموع لكل اللي في دوار العمده.. لحد ما صرخت حماتها فيها
_ قلت اخرسي ، مسمعش صوتك فضحتينا يا وش الفقر انتي وقدم الشوم علينا ..
شاورت راويه علي نفسها ودموعها نازله :
_ انا اللي وش فقر..
لوت حماتها شفتيها وهتفت بغيظ:
_ ايوه بوز خراب حاكم ما هي بتبقي اقدام يا حبيبتي وانتي واضح من قدمك علينا ، بوز نحس وشوم..

و اسمعي أما اقولك يا بت انتي اللي وصلني واللي بيدور برا ويتقال عليكي لازم اتاكد منه والا قسما عظما ارميكي برا راميه الكلاب واخلي ابني يطلقك ويرمي اليمين عليكي حالا وافضحك فالدنيا بحالها.. واقول انك معيوبه..
برعشه في صوتها قالت:
_ وصلك ايه يا خالتي والله ما حد لمسني صدقيني دي اكيد حوريه الي حبت تشوه صورتي بعد جوازي من ابنك الي سابها.. ومعبرهاش

_ لا مش حوريه مقصوفه الرقبه المره دي دي حد تاني بس بردو هنتأكد.. يالا يا حرمه منك ليها. كتفوها وطمنوني عليها..
حاولت بكل الطرق تصرخ ولا تفلت من أيديهم لكن مقدرتش زادت من صراخها والنسوان مكتفاها من ايديها ورجليها وفريد في الغرفه التانيه شارد في حوريه واللي عملته وفي اللي مروا بيه وخذلانه ليها لحد ما فاق علي صرخه جامده من راوية انتفض بعدها زي اللي لدغته حيه..وهو بيفكر أنه ميستحقش حتى لقب راجل بعد اللي سابهم عملوه فيها هي كمان..بس مش بايده مش بايده ابدا.. لان علته كبيره..

غمض عنيه وكتم ودانه بايده وهو سامع صوت ضرب النار بعد ما رمت امه المنديل برا من شباك الأوضه علشان تثبت شرف مرات ابنها ورجوله ابنها وتخرس الالسنه اللي بتحكي وتتحاكي عليهم..
بوجع بقلبه همس :
_ سامحيني يا حوريه.. سامحيني….
_______